Preguntas frecuentes

As persoas que queiran solicitar fondos á Pepa Loba deberán escribir a info@pepaloba.org indicando no asunto do correo “CAMPAÑA: Solicitude de apertura”. No corpo de texto deberanse explicar as características básicas da campaña brevemente.

Responderase sempre se a Campaña foi recibida. No caso de non obter resposta de ningún tipo despois de 7 días, por favor, volve a te poñer en contacto connosco.

No caso de ser aceptada a Campaña, recibirás un segundo correo onde se che indicarán os próximos pasos. Este segundo correo recibiralo non antes de 10 días dende a recepción do primeiro correo.

As persoas que queiran solicitar fondos á Burla Negra deberán escribir a info@pepaloba.org indicando no asunto do correo “ALERTA ANTIRREPRESIVA: Solicitude de apertura”. No corpo de texto deberanse explicar as características básicas do caso brevemente.

Responderase sempre se o caso foi recibido. No caso de non obter resposta de ningún tipo despois de 7 días, por favor, volve a te poñer en contacto connosco.

No caso de ser aceptado o caso, recibirás un segundo correo onde se che indicarán os próximos pasos. Este segundo correo recibiralo non antes de 10 días dende a recepción do primeiro correo.

As persoas que soliciten unha “Campaña” deberán realizar un cadro onde indiquen que puntos levarán ao cabo dependendo da cantidade concreta que se recade ata o final do proceso. O cadro amosará en orde ascendente cada unha das partes da iniciativa que se realizarán dependendo da cantidade acadada. En todo caso o orzamento de cada etapa deberá ser realista, verificable e sempre partirá dende o capital cero (0€) ata a cantidade total necesaria para o desenvolvemento da iniciativa. A primeira desas fases deberá ser sempre de 0 a 100 euros.

Pepa Loba aposta por un modelo de microfinanciamento que se afasta do modelo de “todo ou nada”, polo que é preciso que as persoas que fan achegas ás iniciativas saiban en todo momento que se vai facer cos seus cartos e conten coa maior garante posible de que a súa achega acada o seu obxectivo. Pepa Loba é unha ferramenta que pretende facilitar o desenvolvemento de iniciativas sociais, ao tempo que xera unha rede solidaria que colabora na construción deses proxectos.

As “Campañas” e as “Alertas Antirrepresivas” mantéñense abertas sempre durante 75 días (acaden ou non o seu obxectivo, durante ese período ou con antelación). Unha vez expirado ese prazo péchase e iníciase o proceso para facer chegar a cantidade económica acadada a quen impulsou a “Campaña” ou a “Alerta Antirrepresiva”.

A Pepa Loba non cobra ningún tipo de comisión porque o seu obxecto é facilitar o labor de persoas e organizacións que loitan por un mundo máis xusto.

Porén, os actuais sistemas de pago con tarxeta ou transferencia dixitais (ou calquera outro sistema), conleva o cobro de comisións e/ou gastos por parte das entidades financeiras que se achegan ao 2%. A isto habería que engadir que, dependendo do país e da entidade, poden sumarse outro tipo de custos impositivos ou de taxas externos. A Pepa Loba en ningún caso asumirá as comisións, gravames ou impostos, que serán asumidas integramente por quen o impulsa.

Por esta cuestión recoméndase que na cantidade a solicitar polx interesadx debe terse en conta o anteriormente mencionado, e engadir un 2,5% (2% de gastos e/ou comisións bancarias + 0’5% de custos impositivos ou taxas externos) da cantidade que se vai solicitar de xeito efectivo. A modo de exemplo: Se unha organización pretende acadar 3.000€ deberá solicitar un mínimo 3.075€ [3.000€ + 75€ (2,5% de 3.000€)].

Unha vez se acepta a unha “Campaña” ou “Alerta Antirrepresiva” enviarase un correo que contén unha ficha onde se solicitan os datos xerais que se precisan para poder avaliar e estruturar o caso máis polo miúdo.

Avaliada e aceptada de xeito definitivo a “Campaña” ou “Alerta Antirrepresiva”, enviarase un segundo correo onde se solicitará que se envíe o material gráfico e unha segunda ficha cuberta para:

• Poder establecer o contrato que fixa as condicións que nos unen en torno ao caso solicitado.


• Poder estruturar e desenvolver o material comunicativo preciso para a web e as redes sociais.

Publicarase o caso na web e enviarase o material correspondente para poder darlle a maior difusión posible. A partir de aí xa se pode mover a “Campaña” ou “Alerta Antirrepresiva” como ben se guste!

Na web poderase ir vendo a cantidade que se vai acugulando coas diferentes achegas á “Campaña” ou á “Alerta Antirrepresiva”.

Unha vez se lance a “Campaña” ou a “Alerta Antirrepresiva” quen a impulsa recibirá unha comunicación onde se indicarán os datos que se deben facilitar para a redacción do contrato. Asemade, informarase dos pasos a seguir dende ese intre.

Para poder recibir os cartos acadados deberase facilitar entre outros datos, unha conta bancaria.

Non se iniciarán os trámites de pago ao/á impulsor/a ata que remate os 75 días de duración da “Campaña” ou da “Alerta Antirrepresiva”. A partir dese momento poderán transcorrer ata 30 días laborais contados dende a data de peche da recadación, para que x impulsor/a reciba os cartos recadados na conta bancaria facilitada para tal fin, agás por causas alleas á Pepa Loba.

A Pepa Loba aboará as cantidades acadadas nun prazo non superior a 30 días laborables contados a partir da data de peche da recadación do financiamento, agás por causas alleas á Pepa Loba.

Non, xa que ao total acadado hai que restarlle os gastos xerados polas comisións bancarias e polos gravames, cobros ou impostos de calquera tipo que lle sexan imputados.

A Pepa Loba non cobrará ningún tipo de comisión, pero tampouco asumirá os gastos mencionados, que serán integramente asumidas por quen impulsa a “Campaña” ou “Alerta Antirrepresiva”.

Exactamente o mesmo que sucedería se se acada o 100% dos cartos. Quen impulsa unha “Campaña” ou “Alerta Antirrepresiva” recibirá a cantidade acadada, restándolle os gastos xerados polas comisións bancarias e polos gravames, cobros ou impostos de calquera tipo que lle sexan imputados, que serán sempre integramente asumidas polx/s impulsorx/s.

A Pepa Loba e a Burla Negra son ferramentas pensadas para facilitar que as persoas e organizacións poidan levar ao cabo iniciativas, proxectos, campañas e accións a través dunha ferramenta que lles permita acadar o financiamento que precisen para poder desenvolvelas. Tanto quen impulsa como a Pepa Loba participan na construción de alternativas e resposta social a través do traballo conxunto e solidario.

A Pepa Loba entende que quen impulsa unha "Campaña" ou "Alerta Antirrepresiva" ten realizado previamente unha análise exhaustiva do que vai necesitar, e que, como consecuencia desa análise, solicita unha cantidade axustada ás súas necesidades.

Se se dese o caso, unha vez acadado o 100% do total solicitado (e unha vez descontados os gastos xerados por comisións ou impostos), quen impulsa a “Campaña” ou “Alerta Antirrepresiva” doará o excedente do financiamento acadado ao fondo común da Pepa Loba, coa finalidade de sustentar as iniciativas e proxectos que na asociación poidan desenvolverse.

A Pepa Loba non cobra polos seus servizos. A actitude solidaria é un dos elementos que vertebra o seu funcionamento. A finalidade é xerar unha ferramenta que facilite o desenvolvemento de proxectos e iniciativas que beneficien ao conxunto. O único que se cargará no total do importe acadado aos/ás impulsorxs serán os gastos alleos á Pepa Loba derivados da entidade bancaria (ou das administracións se fose o caso) que se esixan para a tramitación da transferencia económica ao/á impulsor/a.

A Pepa Loba emprega todos os fondos que acada para facer fronte aos gastos continuos (servidores, dominios,...) ou aos gastos puntuais (desprazamentos, folletos,...) para poder medrar na súa actuación, así como tamén para impulsar, desenvolver e contribuír a desenvolver proxectos, iniciativas, campañas e accións de alternativas e resposta social.

Non. Cada “Campaña” ou “Alerta Antirrepresiva” ten unha finalidade determinada de financiamento, polo que a achega económica realizada pola persoa que contribúe a impulsala só se destinará á mesma. Dende que se inicia ata que se remata, cada “Campaña” ou “Alerta Antirrepresiva”, ten unha finalidade definida e inalterable, completamente independente das demais que se desenvolvan.

Non. A información textual e as imaxes que decida empregar quen impulsa unha “Campaña” ou unha “Alerta Antirrepresiva” permanecerá inalterable dende o seu lanzamento ata o remate da mesma.