Lanzamento de 13 Editora

13 editora é un proxecto editorial sen ánimo de lucro de carácter independente que xorde ao abeiro de  ECOAR))), unha ferramenta de formación e información social, económica, política e cultural que pretende producir contidos que espallen o pensamento crítico e alternativo a través de olladas e discursos de carácter plural. Así, 13 editora pretende propiciar a construción dun tecido social proactivo e analítico que contribúa a facer máis libres ás persoas a través da destrución dos prexuízos e o cuestionamento das liñas de pensamento "imperantes", así como do espallamento e construción de novas estratexias, olladas e realidades que permitan conformar un mundo máis xusto.

Se ben na actualidade existen diversos proxectos editoriais centrados na publicación de textos orientados á transformación social, 13 editora nace da necesidade específica de difundir, en lingua galega, obras reflexivas e contidos prácticos destinados á formación que presenten olladas e voces diferentes ás das correntes maioritarias, repercutindo positivamente na activación das persoas e sociedades, e dotándoas de ferramentas de carácter diverso para interpretar e diagnosticar a realidade e a si mesmas dende unha perspectiva plural e crítica en prol dun sistema social xusto.

A principal fortaleza de 13 editora reside nos aspectos diferenciadores da súa produción editorial, entre os que destacan, ademais da tradución dos textos á lingua galega por primeira vez, a selección das obras, as edicións contextualizadas e adaptadas á actualidade, o contido gráfico de produción propia, a calidade da edición ou a accesibilidade dos contidos a través de diversos soportes e a posibilidade de acceso gratuíto ou de pago.

O crowdfunding contempla a edición das dúas primeiras obras de 13 editora, incluíndo:

• Consecución de dereitos de tradución e publicación (todas aquelas cuestións derivadas das condicións editoriais).
• Produción do libro (impresión e encadernación).
• Distribución do libro (tanto en envíos puntuais como aos puntos de venda fixa).

As obras editadas por 13 editora están orientadas tanto aos públicos que teñen xa certo percorrido e experiencia no eido do activismo, como a aqueles que, sen estar aínda activados, queren ser parte do cambio. Así, os obxectivos de 13 editora son os seguintes:

• Difundir o pensamento crítico e alternativo a través de olladas e discursos
• de carácter plural.
• Recuperar materiais descatalogados, minoritarios, esgotados ou pouco difundidos que pertenzan ás liñas de pensamento definidas pola editora.
• Dar voz a persoas, colectivos ou comunidades que constrúan novas estratexias, olladas e realidades que permitan conformar un mundo máis xusto.
• Desenvolver materiais en diferentes soportes que doten de ferramentas emancipadoras, de mobilización, acción e organización ás persoas, colectivos e comunidades.
• Elaborar materiais de calidade a través dunha concepción creativa e integral de cada un deles entendéndoos como unha peza artística particular e como unha ferramenta de acción e construción social.
• Xerar simbiose e tecer rede entre proxectos, persoas, colectivos, comunidades e liñas de pensamento do pasado, o presente e o futuro.
• Promover unha concepción aberta, non privativa, pública, libre e solidaria da cultura e a información.

Este lanzamento está promovido pola propia 13 editora, un proxecto centrado no desenvolvemento de materiais de diversa índole que garantan a conformación de persoas autónomas, críticas e proactivas que poñan freo aos abusos e inxustizas cometidas polas transnacionais e polas grandes estruturas e organismos de poder sistémico, ao mesmo tempo que crean e garanten un mundo máis xusto e proactivo no que se respecten o planeta e os dereitos de todxs xs que nel habitan.